Pais e nais, estudantes e docentes iniciaron hoxe luns día 21 un peche no Instituto de Educación Secundaria San Tomé de Freixeiro de Vigo para esixir da Consellaría de Educación que non aplique no noso país ningún dos recortes que recolle o RD Lei 14/2012 ou que o recorra por invadir as competencias que en materia educativa ten a Xunta. O peche, promovido pola Plataforma Galega en Defensa do Ensino Público, iniciouse ás 16.00 horas e está previsto que remate ás 9.00 horas do martes 22.

A CIG de Verín reclámalle á Consellería de Sanidade que paralice as xestións encamiñadas a suprimir o servizo de urxencias da vila, situado na rúa Juan Guerra Valdés e critican a pasividade do Goberno local diante dun novo ataque aos servizos públicos por parte da Xunta. Ao mesmo tempo, denuncian que non se está a informar sobre a decisión os veciños/as nin os profesionais que desenvolven o seu labor no centro e esixen a convocatoria dunha xuntanza con todos os sectores implicados.

Un grupo de pais e nais, estudantes e docentes permanecen pechados desde hoxe ás catro da tarde no Instituto de Educación Secundaria Rosalía de Castro, de Santiago, para esixir da Consellaría de Educación que non aplique en Galiza ningún dos recortes que recolle o RD Lei 14/2012 o e que o recorra por invadir as competencias que en materia educativa ten a Xunta de Galiza. O peche, promovido pola Plataforma Galega en Defensa do Ensino Público, rematará ás nove da mañá do martes 15 e terá continuidade cun novo encerro da comunidade educativa, ese mesmo día, ás 16:00 horas, no IES Concepción Areal de Ferrol.

Contra as 10:00 horas deste xoves 10 de maio, xornada de folga no ensino secundario e universitario, a CIG celebraba a asembleas de delegados e delegadas en todas as comarcas, nas que se analizaban as gravísimas repercusións que terán os recortes orzamentarios impostos polo goberno do PP nos presupostos para este ano. Nas mesmas denunciábase a submisión do goberno da Xunta, que lonxe de facer uso das súas competencias, aplica os recortes decretados desde Madrid malia as consecuencias que terán para servizos públicos básicos para as galegas e galegos como a sanidade e o ensino.

A Plataforma para a Defensa da Ría do Burgo fixo entrega este mediodía no Rexistro da Delegación do Goberno na Galiza das máis de 1.000 sinaturas recollidas en pouco máis de dúas semanas entre a veciñanza da Coruña e a súa comarca. Representantes do colectivo presentaron estas sinaturas a modo de alegacións-petición popular ao Proxecto de Lei de Orzamentos Xerais do Estado e para esixir que estes inclúan partidas económicas destinadas ao saneamento e rexeneración integral da Ría.

Centos de persoas participaron hoxe nas concentracións simultáneas convocadas en todas as comarcas do país para demandar da Xunta o cese dos recortes no ensino público. Con estas mobilizacións, a Plataforma Galega en Defensa do Ensino Público Galego, inicia o calendario de accións que teñen como obxectivo evitar a aplicación no noso país do Real Decreto-Lei 14/2012 de medidas urxentes de racionalización do gasto público no ámbito educativo.

Representantes da CIG e do Comité de Empresa de Preescolar na Casa informaron hoxe, en rolda de prensa, da presentación de 25.000 sinaturas en apoio á Iniciativa Lexislativa Popular promovida para garantir a supervivencia deste programa educativo, despois de que Xunta de Galiza lle retirara todas as subvencións. A rapidez e número de apoios que se acadaron -dez mil máis dos necesarios en dous  meses- poñen de manifesto o respaldo social que esperta Preescolar na Casa.