Os traballadores e traballadoras da Auxiliar de Alcoa  do Grupo Rodabell –Rodabell S.A; Montajes Rodabell SL; Mecanizados Rodabell S.L veñen de convocar unha folga indefinida de unha hora (de 8 a 9 da mañá) todos os luns, a partir do vindeiro 7 de maio. Denuncian os recortes que, unilateralmente e sen xustificación e/ou aviso previo, vén aplicando a empresa sobre as prestacións e dereitos que, desde o inicio da prestación laboral, son parte do salario.

O Gabinete Técnico de Saúde laboral da CIG celebrará o mércores 25 de abril unha xornada/asemblea para delegadas e delegados da comarca da Mariña. Asistirán delegadas e delegados de distintas empresas radicadas na comarca e de diferentes sectores (mar, construción, administración, metal e saúde). O acto iniciarase ás 10:30 da mañá e rematará ás 18:30 horas.

A CIG conseguiu a maioría dos votos en Cyrgasa, empresa auxiliar da fábrica de Alcoa de San Cibrao, nas eleccións sindicais celebradas o pasado 20 de abril. Estaban convocados para este proceso, no que se escollían cinco delegados para o Comité, os 98 traballadores/as que conforman o cadro de persoal. Destes/as exerceron o seu dereito de voto 83 persoas, o que representa unha participación de case un 85%.

A CIG no Concello de Betanzos vén de presentar unha reclamación por rexistro solicitando que a institución municipal cese no trato discriminatorio cara ao persoal laboral logo de que, por segunda vez nesta lexislatura e por primeira vez un Goberno municipal, non abone as axudas sociais ao persoal laboral e si ao funcionario. Para as/os delegadas/os da central sindical trátase “dun acto descarado de clara discriminación cara aos/ás laborais”.

A CIG acadou maioría absoluta en Os Irmandiños, cooperativa de servizos e produtos agropecuarios de Ribadeo, ao obter tres delegados mentres que UGT acadou un e unha candidatura independente outro. A participación nas votacións foi do 72%.

Os traballadores e traballadoras de Atento continuaron este luns coas mobilizacións en contra das reducións de xornada para o persoal do servizo CAT- ADSL, que actualmente xa ten contratos a tempo parcial. Os traballadores/as secundaron dúas concentracións, por quenda de traballo, entre ás 11 e ás 12 da mañá e pola tarde das 19 ás 20 horas.

A CIG da Mariña vén de remitir unha valoración dos datos económicos achegados na documentación que acompaña ao ERE de Finsa, dos que se desprende que o Grupo subiu as retribucións do seu Consello de Administración un 81% antes de presentar o expediente de regulación. Así mesmo, a central culpa directamente dos resultados negativos á mala xestión e á “pésima inversión” que a dirección fixo ao adquirir Tableros Faus, no ano 2006, por 195 millóns de euros (e que en 2010 tivo que ser provisionada por un importe de 36,9 millóns de euros), xa que, pola contra, a actividade ordinaria do Grupo experimentou unha mellora considerábel neste tempo.