Os delegados e delegadas da CIG en novagalicia banco, no Banco Gallego (entidade participada) e nas empresas auxiliares (HP, Unicom e CISER) convocan unha concentración o vindeiro día 24 de maio diante do edificio administrativo da Xunta de Galiza, en San Caetano, para esixir unha solución inmediata e urxente, un plan de futuro para NCG Banco, que garanta os máis de 7.000 postos de traballo.

A Federación de Banca da CIG realizou este venres unha xornada de protestas diante dalgúns dos maiores call centers de Vigo e A Coruña en demanda dun convenio xusto e para rexeitar o preacordo asinado pola patronal, CCOO e UGT, que supón unha perda salarial de 596 euros en dous anos, pendentes da suba do IPC durante o resto da duración do mesmo, e nun contexto de medre da facturación das empresas.

O pasado 27 de abril a CIG-Banca solicitaba a convocatoria urxente da comisión negociadora para a integración dos plans de pensións de Caixa Galicia e Caixanova, que finalmente foi convocada pola empresa para o día 9 de maio. Nesa xuntanza, CIG-Banca defenderá chegar a un acordo, sen máis dilacións, por entender que adiar a negociación de integración dos plans de pensións pode levar a súa transformación nun fondo interno, perdendo dereitos. Ademais, proporá reducir a prestación con cargo ao plan de pensións aos ex directivos a un euro.

Traballadores e traballadoras dos Bancos Pastor e Popular realizaron unha nova concentración o venres 4 de maio na Coruña para demandar das direccións de ambas entidades información sobre os custes laborais do proceso de absorción, esixir a negociación colectiva das condicións de traballo e defender a continuidade dos empregos en Galiza. A mobilización, convocada polas Seccións Sindicais da CIG no Pastor e no Popular, repetirase novamente o martes e xoves da semana próxima.

O Comité de Atento A Coruña acaba de informar da interposición de demanda de conflito colectivo contra a empresa para reclamar a nulidade das reducións de xornada impostas a preto de 180 traballadores/as que xa tiñan xornadas parciais. A decisión do Comité veu motivada pola negativa da empresa a chegar a un acordo durante o acto de conciliación que tivo lugar este mércores.

Delegados e delegadas da CIG no Banco Pastor e o Banco Popular iniciaron este martes un novo calendario de concentracións para denunciar o escurantismo co que as cúpulas de ambas entidades están a levar a cabo o proceso de absorción; xa que logo de seis meses do anuncio da medida, o persoal descoñece cal vai ser o seu futuro laboral, en que condicións realizará o seu traballo ou mesmo se se van producir despedimentos e en que contía.

As Seccións Sindicais da CIG no Banco Pastor e o Banco Popular teñen convocada unha concentración de delegados/as para mañá, martes 24 de abril, de 11:00 a 11:30 horas, diante da sede do Banco Pastor (Cantón Pequeno, 1) e a Xefatura Territorial do Popular, para esixir a apertura dunha mesa de negociación coa representación social, información a respecto do futuro laboral dos traballadores/as de ambas entidades, e o mantemento dos postos de traballo en Galiza.