Actualidade Santiago, 10 de outubro de 2007 Exixen a readmisión de dous traballadores despedidos por reclamar melloras laborais Os traballadores da UTE PLOCOR 2 convocan folga indefinida a partir do 15 de outubro   CIG-Comunicación- cig.prensa@galizacig.com   Os traballadores da UTE PLOCOR 2, encargada do mantemento de parte da A-6 e da N-VI desde Lugo até o límite coa provincia de A Coruña, explicaron –en rolda de prensa– que o despedimento fulminante dos dous traballadores produciuse logo de que estes transmitiran á Dirección da empresa a necesidade de renegociar as súas condicións laborais. “Unha actitude claramente antisindical e que vai en detrimento das liberdades en materia laboral dos traballadores”. (Foto: ©galizacig.com 09/10/2007).   Os traballadores da UTE PLOCOR 2 acordaron convocar folga indefinida a partir do día 15 de outubro en demanda da readmisión dos dous traballadores despedidos por reclamar melloras nas súas condicións laborais. Este feito que avalían coma “gravísimo”, constata o “pouco respecto que teñen na empresa Construcciones Cortizo e en Ploder SA –ambas as dúas conforman a UTE– pola lexislación laboral e os dereitos dos seus traballadores”. Os traballadores da UTE PLOCOR 2, encargada do mantemento de parte da A-6 e da N-VI desde Lugo até o límite coa provincia de A Coruña, explicaron –en rolda de prensa– que o despedimento fulminante dos dous traballadores produciuse logo de que estes transmitiran á Dirección da empresa a necesidade de renegociar as súas condicións laborais. “Unha actitude claramente antisindical e que vai en detrimento das liberdades en materia laboral dos traballadores, máis propia de organizacións que teñen unha forma de actuar baseada no medo e a presión, que na marcada pola lei” afirman. Convocatoria de folga Tras producirse os despedimentos os traballadores reuníronse en asemblea urxente na que acordaron, por unanimidade, a convocatoria de folga indefinida a partir do vindeiro día 15 de outubro. Malia todo, na rolda de prensa adiantaron a súa disposición a negociar para evitala, sempre e cando sexan readmitidos nos seus postos os dous traballadores despedidos. Alén diso, lanzaron unha seria advertencia ás diferentes administracións por permitir que empresas que dependen, case en exclusiva, da carga de traballo que lles proporciona a propia Administración incumpran reiteradamente a lexislación laboral. Ao seu entender esta situación denota a falta total de control sobre estas empresas cando deberan ser garantes e dar exemplo de boas prácticas laborais. Os traballadores solicitaron tamén que se lle abra un expediente informativo a Construcciones Cortizo SL para dilucidar se cumpre a lexislación. De comprobarse que non a cumpre, os traballadores exixirán que lle sexan rescindidos os contratos en vigor. Ademais reclaman que dunha vez por todas, a Administración se involucre firmemente na defensa dos dereitos laborais poñendo como condicións que as empresas que fagan obra pública, cumpran escrupulosamente coa lei.

Confederación Intersindical Galega www.galizacig.com ÚLTIMA REVISIÓN: 10/10/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta