|
Actualidade CIG-Comunicación-
A manifestación partiu, contra as 11:30 horas, da Estación de Autobuses de Compostela para facer a súa primeira parada diante do Parlamento de Galiza. De aí continuou polas principais rúas da cidade para finalizar cunha concentración ás portas dos edificios administrativos da Xunta de Galiza. Pero a concentración non puxo fin ás protestas dos traballadores. Mentres uns representantes dos Comités de Empresa lían o comunicado que resumía as súa demandas, outros, acompañados polo secretario xeral da CIG, Suso Seixo, solicitaban entregar directamente unha copia do escrito aproveitando que, nese intre, se celebraba o Consello da Xunta. Ao tempo que iso ocorría, arredor de 40 enormes camións, comezaban a achegarse aos arredores do edificio. Os traballadores tiñan decidido cortar a circulación viaria até non recibir unha resposta da Administración. E esta non se fixo esperar. Contra as 12:45 horas, o conselleiro de Traballo informaba, a través dun representante e da propia policía –que cercaba o edificio– que recibiría a unha delegación para tratar o tema. Acordada a improvisada xuntanza, os traballadores concentrados dispersáronse, arredor de San Caetano, pechando as entradas e saídas de tráfico e impedindo a circulación da caravana de camións chegados da mina e de todos os coches que intentaban pasar pola zona. A propia policía local colaborou no corte de tráfico pechando, á súa vez, a Avenida de Lugo e desviando o tráfico de entrada na cidade pola estrada de A Coruña cara a rúas secundarias. Os traballadores non deron por rematados os cortes de tráfico até que os seus representantes non saíron da xuntanza e deron a coñecer os resultados da mesma. Suso Seixo foi o encargado de informar das conclusións da reunión mantida co conselleiro de Traballo, nomeadamente o seu compromiso de facer entrega do escrito que lle fixeron chegar aos responsábeis do Ministerio de Fomento e do propio ADIF e do compromiso de manter cos tres comités e con representantes da CIG e da UGT unha reunión na vindeira semana na que estarían as consellarías de Industria e Traballo. Malia todo, na súa intervención Seixo advertiu que as mobilizacións continuarán mentres non haxa probadas garantías de que ningún dos postos de traballo corre o risco de desaparecer, pase o que pase con Villar Mir. E non só iso. Tamén adiantou que os traballadores manterán as súas protestas mentres non estea garantida a explotación de silicio solar, un mineral escaso que posibilitaría abrir novas liñas de traballo para as plantas de Ferroatlántica en Cee e Sabón.
Os Delegados de Persoal de Ramsa, os Comités de Empresa de Ferroatlántica de Cee-Dumbría e de Sabón-Artexio, así como as centrais sindicais CIG e UGT. Comunicado a toda a opinión pública e ás autoridades galegas e españolas. 1. Entendemos que o Tren de Alta Velocidade (TAV) é necesario para a mellora das infraestruturas de Galiza e en consecuencia para o desenvolvemento do noso país, pero iso non pode facerse a costa de pór en perigo postos de traballo e proxectos industriais hoxe existentes. 2. O trazado aprobado polo Ministerio de Fomento, o 25 de abril de 2003, ao seu paso polos concellos de Vedra e Boqueixón, soterrará 146 millóns de toneladas de seixo de excelente pureza, na mina de Serrabal, explotada mediante concesión pola Empresa Rocas, Arcillas y Minerales, S.A. 3. Os delegados de Persoal e Comités de Empresa arriba indicados, levamos desde o ano 2002 advertindo ás Administracións tanto española como galega, do risco de perda de postos de traballo, presentes e futuros, de non se modificar o actual trazado do TAV por outro máis racional que non afectaría á mina nin a ningún núcleo de poboación, trazado alternativa que xa fora valorado no seu momento polo Ministerio de Fomento, sendo ministro Álvarez Cascos, do partido popular, e que foi finalmente desbotado sen que ninguén até o de agora nos teña explicado o porqué desta decisión tan absurda. Por outra banda, despois dunha reunión co presidente da Xunta e diversas reunións na Consellaría de Política Territorial, Consellaría de Industria, Consellaría de Traballo, Delegación do Goberno e co presidente de ADIF (Administrador de Infraestruturas Ferroviarias), organismo dependente directamente do Ministerio de Fomento, a única resposta que se nos dá é que o trazado non pode variar porque “non pode haber máis atrasos” e “a afección da mina é mínima”; todo isto se afirma ao abeiro dun raquítico estudo xeolóxico feito pola Universidade de Oviedo ao que nos foi imposíbel acceder, pois foinos negado todas as veces que o pedimos, malia ser un estudo pagado con fondos públicos e, polo tanto, o acceso debería ser tamén público. En calquera caso, o atraso que puidera producirse polo cambio do trazado, nunca sería superior a outros que xa se están a dar e de todos eles a única responsábel sería a Administración. Os traballadires de Serrabal e de Ferroatlántica levamos anos advertindo dos prexuízos do actual trazado, tanto desde o punto de vista dos postos de traballo, como da seguridade dos usuarios do TAV, trazado que vai pasar a escasos cen metros dunha mina na que se traballa con explosivos e hai un importante movemento de terras. 4. Existe unha Proposición non de Lei, aprobada por unanimidade no Parlamento de Galiza, que entre outras cousas solicita informes á Administración galega, sobre a posíbel afección nas reservas da mina de Serrabal e o emprego, en caso de manter o actual trazado, para un posterior debate nesta Cámara e toma definitiva dunha postura ao respecto. Pois ben, a pesar de existir esta resolución do Parlamento galego, os señores de ADIF continúan para adiante coas expropiacións dos terreos afectados polo trazado, poñendo de manifesto o desprezo do Ministerio de Fomento polas resolucións do Parlamento de Galiza. Solicitamos que se paralice de xeito inmediato este proceso expropiatorio mentres non existan conclusións en todos e cada un dos puntos que na resolución se solicitan, sobre todo no relativo á continuidade dos postos de traballo e o grao de afección á mina; grao de afección que sorpresivamente se veu alterado o 4 de setembro do presente ano, pois nas Actas Previas de Ocupación, e sen exposición pública previa, se pretenden expropiar 44.000 metros cadrados máis dos previstos na exposición pública de 2004. Polo tanto, entendemos que a afección e o risco de peche da mina é maior, xa que estes 44.000 metros están situados nunha zona onde xa se está a traballar na actualidade. 5. Queremos salientar, así mesmo, que unha
boa parte do seixo que quedará soterrado, se non se varía o trazado, é de tal pureza que a
súa transformación, despois de diferentes procesos produtivos, daría como froito un silicio
de altísima pureza (silicio solar fotovoltaico), válido para a fabricación de paneis solares
fotovoltaicos. Por todo o anteriormente exposto, SOLICITAMOS do Goberno galego, e nomeadamente do seu presidente, Emilio Pérez Touriño, que faga as xestións necesarias para, por una lado, parar as expropiacións en tanto o Parlamento de Galiza non se pronuncie de xeito definitivo, e por outro promover unha nova xuntanza entre ADIF, Empresa e Comités de Empresa, coa fin de aclarar o futuro dos nosos postos de traballo. Por último, engadir que seguiremos insistindo de calquera xeito en que o cambio de trazado do TAV, ao seu paso por Serrabal, sería a solución definitiva ao conflito pois é a única garantía presente e futura para o mantemento dos postos de traballo e a que le daría plena seguridade aos usuarios da dita infraestrutura.
|
|||||||||||||||||||||||||||||||||||||||||||||||||||||||||||||||
Informacións relacionadas
|
|||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||
|
ÚLTIMA REVISIÓN: 26/10/2007 |
|||||||||||||||||||||||||||||||||||||||||||||||||||||||||||||||
|
