|
Actualidade CIG-Comunicación-
A CIG, que estará novamente presente na mesa do convenio, vén de denunciar que dende a sinatura do anterior acordo o sector viuse sometido ao peche dun gran número de empresas, o que se traduciu en milleiros de despedimentos en Galiza e no resto do Estado debido á deslocalización. Neste senso, para a CIG a negociación colectiva é un instrumento válido para frear a deslocalización apostando pola profesionalización e a calidade do servizo. En ningún caso o sector pode competir en baixos salarios con Perú, Colombia ou Marrocos, países beneficiados polos procesos de deslocalización dos callcenter. Nesta negociación, a representación da CIG estará composta por traballadoras e traballadores deste sector nas maiores empresas da Galiza. Reproducimos a continuación o comunidado emitido pola CIG tras esta primeira reunión de constitución da Mesa Negociadora do IV Convenio Estatal de Telemárketing. «Dende a sinatura do III Convenio Colectivo Estatal de Telemárketing por parte da patronal, CCOO e UGT, asistimos ao peche e deslocalización dun gran número empresas con milleiros de despedimentos en Galiza e no resto do Estado. Neste senso, para a CIG a negociación colectiva debe ser un instrumento que contribúa a garantir os nosos postos de traballo. Nunca poderemos competir en baixos salarios con países do terceiro mundo; o sector debe inclinarse pola profesionalidade e calidade do servizo. Isto implica estabilidade no emprego e creación dunha carreira profesional ligada a formación e a antigüidade. O 13 de marzo, con 4 meses de retraso constituíuse a Mesa Negociadora do IV Convenio Colectivo, na que a CIG está presente por dereito propio. Mal empezamos cando 45 minutos despois da hora fixada para o comezo da reunión descubrimos porque non chegaran CCOO, UGT nin a patronal. Como era previsible, e como xa fixeran na negociación anterior, tiñan unha reunión paralela a porta pechada, negociando algo do que non deben sentir moito orgullo, xa que nin nos comunicaron que o estaban facendo, nin explicaron os temas dos que falaron. Unha vez reunida a mesa, infórmase de que os sindicatos ELA e LAB protestan por escrito por non ser citados para esta negociación a pesar de estar lexitimados para elo. No resto da xuntanza, de xeito sorprendente, os representantes de todas as partes estivemos de acordo en que o prioritario era (hoxe si) constituír a mesa e fixar un calendario de negociación. Fica pois constituída a mesa negociadora, co compromiso inicial de reunirse as segundas e cuartas semanas de cada mes, sendo a seguinte o martes, 27 marzo pola tarde. Seguiremos informando…».
|
|||||||||||||
Informacións relacionadas
|
|||||||||||||
|
|||||||||||||
|
ÚLTIMA REVISIÓN: 15/03/2007 |
|||||||||||||
|
