|
Actualidade
Vigo, 30 de outubro de 2004
O Consello Confederal da CIG rexeita
a Constitución Europea
| |
 |
| Podemos afirmar que esta Constitución
Europea nega os nosos dereitos nacionais e consolida as políticas neoliberais, é polo tanto regresiva
en materia social e laboral para o noso povo e a clase obreira, para alén das declaracións xerais
de tipo social que no texto se realizan, máis como cobertura mediática que como principios e obxectivos
concretos. |
| |
O Consello Confederal da Confederación
Intersindical Galega reuniuse o venres 29 de outubro para, entre outros temas, valorar a Constitución Europea.
Despois de analizar detidamente este texto básico, que foi asinado hoxe en Roma polos presidentes e xefes
de governo e que deberá ser aprobado por cada un dos Estados da Unión, a CIG valorou como moi negativo
este documento fundamental, ao que ningún de nosoutros nos poderemos subtraer, nen como persoa nen como
identidade nacional.
Compre facer un comentario previo sobre a elaboración
da Constitución Europea, xa que non houbo un proceso baseado nun mandato da cidadanía, do conxunto
da Unión, a unha asemblea constituínte que elaborase o proxecto, fose sometido despois a un debate
nos parlamentos estatais, emendado e reelaborado na asemblea e, posteriormente, sometido a un referendo. Foi un
proceso de elaboración elitista, realizado ao marxe dos cidadáns e con total escurantismo.
Algúns dos aspectos máis negativos
do texto:
- Aínda que se faga unha defensa verbal
dos directos individuais fundamentais se lles subordina ao mercado único e a libre competencia (art. III-69),
ou sexa: ás políticas neoliberais (desregulación laboral) e de expansión das grandes
potencias (globalización).
- O artigo 46 consagra o acceso de lobbies e grupos
de presión nos procesos de tomas de decisión da Unión baixo o rótulo de “Principio
de democracia participativa”. Legalizase na practica os grupos de presión empresariais.
- A Constitución afirma que nace da vontade
dos cidadáns e dos estados (art. 1.1) e que “as competencias da Unión son aquelas que lle atribúen
os estados” (artg 1.9.2) e esixe respecto á unidade territorial de cada estado membro. Polo que nega o dereito
á autodeterminación daquelas nacións sen estado que o soliciten.
- Non hai un recoñecemento explícito
da igualdade entre homes e mulleres.
- Aínda que gaña competencias o Parlamento
da Unión ten prioridade o Consello de Ministros en materia lexislativa (ou sexa os governos dos Estados),
xa que pode aprobar en solitario todo tipo de regulamentos e decisións. Mantense a falla de control dos
cidadáns sobre a UE.
- Substitúese o directo ao traballo que
figura na maioría das Constitucións dos estados membros polo direito a traballar, que non garante
nada.
- Os servizos públicos básicos pasan
a ser servizos de interese social e de interese económico xeral (art. III-55, 56 e 57), abrindo as portas
á privatización. Os servizos públicos non serán prioritarios na UE segundo se indica
(art. III-12) senón “a política monetaria... a política comercial común, a unión
aduaneira...”.
- A Constitución Europea marca como finalidade
converter a Unión Europea nunha potencia militar. Así no art. I-40.3 dise “os estados comprométense
a mellorar progresivamente as súas capacidades militares”.
- Blíndase calquer futura modificación
xa que debe ser por unanimidade. Polo que non se pode falar dun primeiro texto ou dun primeiro paso, xa que nace
para se manter sen modificacións por moito tempo.
A Confederación Intersindical Galega coida
que este documento fundamental é un paso atrás en moitos aspectos esenciais (nacionais, económicos,
laborais, sociais, mesmo de liberdades democráticas básicas). Podemos afirmar que esta Constitución
Europea nega os nosos dereitos nacionais e consolida as políticas neoliberais, é polo tanto regresiva
en materia social e laboral para o noso povo e a clase obreira, para alén das declaracións xerais
de tipo social que no texto se realizan, máis como cobertura mediática que como principios e obxectivos
concretos. Por estes motivos a CIG acordou dicir non a este texto da Constitución e solicitar dos traballadores
e o conxunto do povo galego unha oposición activa.
Compre que a Unión debata dun xeito democrático,
contando coa sociedade toda, un novo texto de Constitución que sexa progresista no social, recoñeza
os dereitos de todas as nacións ou nacionalidades, afortale os dereitos individuais e a paz. O NON a este
texto é un voto afirmativo a un mundo máis xusto e solidario.
Non a unha Constitución que afortala o libre
mercado e a precariedade laboral !!!
Non a unha Constitución Europea que nega os nosos direitos nacionais !!!
Non a unha Constitución Europea feita a medida dos estados e persoas poderosos !!!
Santiago de Compostela, 29 de outubro de 2004.
|
