Actualidade Vigo, 27 de xuño de 2003 Convenio da Banca Privada Comunicado nº 11   CIG-Comunicación- cig.prensa@galizacig.com   Perto de 250 representantes sindicais dos 13.000 traballadores e traballadoras que ten o sector de Aforro en Galiza percorreron as rúas de Compostela o 25 de xuño. A manifestación é o inicio dun proceso de mobilizacións. (Ver reportaxe gráfica).   A manifestación da CIG do día 25 de xuño en Compostela, coa asistencia de perto de 250 delegados e delegadas, inicio dun proceso de mobilizacións, xunto con outros actos promovidos por outras organizacións sindicais, son acontecementos dos que necesariamente hai que informar e ter presentes como cuestión previa á reunión da mesa negociadora do convenio. Despois do período de reflexión solicitado pola AEB na reunión anterior, na sesión do día 26 de xuño, tal e como estaba preestablecido na orde do día, a patronal tomou a palabra para manifestar a súa posición por primeira vez, e despois dos meses transcorridos. Como inicio, deixan pendente e sen concretar a proposta salarial e o tema de xornada para o final do proceso de negociación. Non obstante, manifestan que están por un convenio de catro anos sen cláusula de revisión salarial e consideran moi difícil a reducción de xornada. Ademais, enumeran toda unha serie de modificacións do articulado do convenio, que pasarán por escrito aos sindicatos para a súa análise e posterior posicionamento. Neste sentido, son de destacar nas modificacións aludidas, a supresión da cláusula de absentismo, estender a 18 meses o tempo de percepción do 100% nos supostos de incapacidade temporal, así como a vontade de incluír redactados que melloren a conciliación da vida familiar e laboral, a igualdade de oportunidades, a non discriminación sindical, as vacacións dos técnicos, licencias, minusvalías, formación, viuvez e orfandade, etc. Dende a CIG, sen deixar de valorar as propostas que nos pasarán por escrito, manifestamos: Que é totalmente inadmisible un convenio por catro anos sen recuperación do poder adquisitivo. Que nunha primeira aproximación vemos moita palla e pouco gran na exposición da AEB. Que unha vez máis, quedan á marxe puntos que verdadeiramente interesan aos traballadores e traballadoras do sector, é dicir, salario, xornada, supresión da mobilidade xeográfica e dereito aos complementos de pensións para o persoal de ingreso posterior a marzo de 1980. Quedou fixada a próxima reunión para o día 10 de xullo. Galiza, 26 de xuño de 2003.

Confederación Intersindical Galega www.galizacig.com ÚLTIMA REVISIÓN: 27/06/2003