Actualidade / Artigo Medra o pesemismo sobre o entorno económico no Estado español Ramón Maceiras- O consenso dos analistas desminte as estimacións oficiais, xa que non só se rebaixa a taxa de medra do Producto Interior Bruto (PIB), senón que ademais se considera moi probábel que o ano 2002 non remate con equilíbrio presupuestário, tal e como reflectiu o Governo nos Presupostos Xerais do Estado de 2002. En concreto, nove dos trece institutos pensan que o ano acabará cun déficit público que se situará entre unha e tres décimas do PIB. Peritos e Governo teñen menos discrepáncias á hora de avaliar canto medrarán os prezos o ano próximo, xa que mentres os primeiros crien que o IPC (meia anual) se situará no 2,9%, o Governo estimou un aumento do deflactor do consumo privado (que soie diferir nunha ou duas décimas da medra do IPC) do 2,8%. As abertas discrepancias en relazón ao aumento do PIB se explican fundamentalmente polo comportamento do sector exterior, xa que o consenso dos 13 institutos é abondo mais pesimista que o Governo sobre o entorno económico. Mentres que, segundo o Executivo, o sector exterior contribuirá cunha décima positiva á medra do PIB, os peritos crien que o saldo de trocos comerciais lle restará tres décimas.
As discrepancias tamén se referen ao aumento do investimento en bens de equipa, xa que mentres o Governo prevé unha vigorosa recuperación (do 1% ao 4%), o consenso dos peritos rebaixa as estimacións ao 2,9%. Os institutos coinciden en que o grande incógnito do ano próximo é o comportamento do consumo privado, o compoñente que mais pesa na actividade económica desde o ponto de vista da demanda (as duas terceiras partes). Segundo o servizo de estudos do BBVA para España, a dificuldade na previsión xurde do feito de que «este ano parte da medra do consumo se debe á afloración de diñeiro negro», como o demostra a caída da demanda de efectivo, tal e como sinalou o próprio Banco de España. En outras palabras, «a xente está anticipando as suas decisións de consumo antes de que apareza o euro», o que producirá unha ralentización no gasto das famílias durante o ano 2002, xa que algunhas compras «xa se farán este año». Esta idea comparte-a Funcas, para quen esta «afloración de efectivo» [diñeiro negro] explica que ainda se rexistren taxas relativamente elevadas na medra do consumo privado, un 2,8% no primeiro semestre deste ano. Na sua opinión, «até o primeiro trimestre do ano 2002» o consumo beneficiará-se da afloración de diñeiro negro. Un fenómeno que explica o feito de que a construcción vaia medrar tanto este ano como o seguinte en taxas relativamente elevadas, por encima do 4%. Peritos e Governo cadran, sen embargo, en que fronte ao que aconteceu noutros períodos da recente história económica española, a chegada da fase recesiva do ciclo non ten por o que traducir-se nunha perda neta de postos de traballo, xa que o límite se sitúa por embaixo do 2% de medra do PIB. Segundo BBVA, se no pior dos casos o PIB medra entre o 1,5% e o 2%, o emprego terá un comportamento equilibrado, pero se «se achega ao 1%» pode comezar-se a destruir emprego. Para BBVA, isto é asi debido a que as reformas laborais «deron os seus froitos», xa que a introducción de maior flexibilidade nas relazóns laborais (ao favorecer a entrada e saída do mercado de traballo) permite ás empresas unha mellor adaptación ao ciclo económico. BBVA, por último, lembra que por primeira vez desde o plano de estabilización (1959), España non poderá contar coa devaluación da peseta para sortear a crise, xa que o tipo de troco do euro é irrevocábel.
Os institutos de conxuntura consultados por Funcas non só cuestionan as previsións de medra económica para o ano 2002, senón que, ademais, demoran a recuperación até o terceiro trimestre do ano. Se até ahi pouco se pensaba que a reactivación chegaria durante os primeiros meses, agora ninguén considera que sexa posíbel lográ-la antes do mes de setembro. Iso si, alomenos, en nengun trimestre se atinxirán taxas de medra inferiores ao 2%. Os institutos de conxuntura estiman que a sima da actual fase descendente do ciclo económico se localizará no primeiro e segundo trimestre do ano próximo, cando a taxa de variación do PIB baixe até o 2,2%, para finalizar o ano con unha medra do 2,8%.
ÚLTIMA REVISIÓN: 19/10/2001 |
