Actualidade / Artigo Santiago, 18 de novembro de 2000 Inflación e desemprego ratifican o cámbio de ciclo económico Manteñen a tendéncia ao alza que se observa ao longo de 1999 e anuncian un novo ano mais duro para os cidadáns que padecen as políticas do PP   Ramón Maceiras- CIG-Comunicación O Índice de Prezos de Consumo (IPC) aumentou un 0,3% en outubro pasado, co que a taxa acumulada de inflación subiu até o 3,3% e o interanual (últimos doce meses) situou-se no 4%, segundo informou o Instituto Nacional de Estadística (INE). A inflación subxacente, que exclue a variación dos prezos enerxéticos e dos alimentos frescos, medrou un 0,1% e situou-se no 2,8% en taxa interanual. O grupo mais inflacionista respecto ao pasado mes foi o de carburantes e combustíbeis, que medrou un 1,9%, mentres que vivenda e cultura aumentaron o 0,7% e o vestido un 0,5%. En canto ao desemprego, esta semana se deron a coñecer os dados do III Trimestre da Encuesta de Povoación Activa (EPA) e o próprio INE adverte que «se observa unha lixeiera desacelerazón no ritmo de criación de emprego (que pasa do 4,3% ao 4,2%) e na taxa de atividade (a relazón entre a povoación activa e a povoación en idade de traballar) cuxo aumento pasou dunha taxa do 2,3% a unha do 2,1% ao feche do terceiro trimestre de 1999 e do 2000. A enquisa publicada polo INE revela que o emprego medrou en todos os sectores, salvo na agricultura. O aumento do emprego foi especialmente notábel na construción, cun incremento de mais de 40.000 ocupados respecto ao trimestre anterior e no sector de servizos, con 125.500 empregos netos mais. Emprego este tradicionalmente estacional e que se destrui rapidamente en épocas de crise. Ademais, a distribución do desemprego no estado español reflecte fortes diverxéncias entre as distintas autonomias, desde unha taxa meia de case o 25% en Andalucía a pouco mais do 6% en Navarra. Galicia atopa-se entre as sete comunidades nas que medrou o paro por encima da meia estatal. Á lus dos resultados da EPA, o emprego temporal medrou proporcionalmente mais que o indefinido, ainda que en valores absolutos aconteza o contrário. En concreto, o emprego indefinido aumentou un 1,1% no trimestre, case a metade da taxa de aumento do emprego temporal, que foi do 2,1% no mesmo período. A finais do pasado mes de septiembre, o 32,3% dos empregados tiña un contrato temporal. En Galicia, a cifra é do 35%. A princípios desta semana o Banco de España fixo publico o seu habitual informe trimestral da economía española onde se apresenta a valoración da atividade económica que realiza o banco central. De acordo con este informe a economía do estado español experimentaria unha lixeira desacelerazón no terceiro trimestre do ano, atinxindo unha taxa de medra interanual do PIB do 4% fronte ao 4,2% rexistado no trimestre anterior. Estes dados, que son perfeitamente congruentes coa percepción que compartimos a maioría das analistas de conxuntura, virian xustificados, case na sua totalidade, por unha certa desacelerazón do gasto privado, xa que o sector exterior manteria a sua aportazón á medra, ainda que con menor dinámica, tanto exportadora como importadora, mentres que o conxunto da formación bruta de capital poderia ter freado o ritmo de deterioro que mostraba nos trimestres anteriores, como consecuéncia da fortaleza da construción e da estabilizazón nas taxas de avance da inversión en equipa. Á marxe destes dados pontoais, este informe inclue tamén unha série de valoracións que poden ser de interés á hora de analisar as perspectivas imediatas da economía do estado español. Por unha parte, se constata que as condicións de renda familiar se están deteriorando sensibelmente, o que se traduce nunha redución das taxas de aforro familiar. Iso, unido a unha significativa dinámica inversora destinada básicamente á edificación residencial, provoca a redución da capacidade de financiación das famílias até níveis que non se reflectiran na história recente, o que rebaixa a expansión da riqueza e, por tanto, a capacidade de consumo a futuro. Confederación Intersindical Galega www.galizacig.com ÚLTIMA REVISIÓN: 18/11/2000